檔案編號：018
日期：2002年5月上旬
人物：陳Sir
有天，一名警員來到死人習作事務所。拿拿淋馬上認出對方，說道：「咦？陳Sir，我o地好耐冇見囉，近況點呀？」CY：「想搵我o地食飯打電話o黎約咪得囉，使乜親自上o黎呢？」陳Sir原來是拿拿淋和CY的朋友。
陳Sir面有難色，說：「其實我上o黎係有事搵你o地幫手。」拿拿淋神色變得有點凝重，「你唔好咁擔心，慢慢同我o地講。」
陳Sir：「件事係咁o既，我上星期o係上環一帶行夜更，雙眼忽然出現一個閃爍o既畫面，好似睇電視受到干擾一樣。」CY：「你o向o個個閃爍o既畫面度見到乜o野？」
陳Sir：「我隱約見到一隻手。隻手好纖細，應該係女仔手。另外……仲偶然閃出幾幕地鐵站o既畫面，我認得係XX地鐵站。過去一個星期，我雙眼重複又重複見到呢o的畫面，覺得好困擾，我懷疑自己惹o左o的污糟o野，所以……就諗到搵你o地兩位。」
拿拿淋：「既然你咁肯定係XX地鐵站，咁我o地就去一趟幫你睇睇啦！」CY：「陳Sir你唔好咁擔心，呢件事我o地一定會幫你解決o既。」陳Sir鬆一口氣，「咁就唔該晒喇！」
拿拿淋和CY去了XX地鐵站，嘗試找出站內有沒有不尋常的地方。CY：「站裡面的確有o的陰氣，但我又未至於感到有人係站裡面死o左，冤魂不息留o向站裡面。」拿拿淋：「唔理點都好，我o地先施法將o的陰氣驅散先啦！」
於是拿拿淋和CY就合力施法將陰氣驅去，希望事件可以就此解決。但過了兩天，情況仍未有好轉，陳Sir又來找他們二人。
陳Sir嘆了口氣，「情況冇好轉，我依然成日見到o個隻女仔手，不過今次除o左見到地鐵站，仲出現o左一幕地鐵路軌o既畫面。拿拿淋：「唔通問題出o向條路軌度？」
CY：「真奇怪，如果有人跌o左落路軌被列車車死，應該被大肆報道，但我o地最近都唔見有墮軌意外o既新聞。」拿拿淋：「我o地識得有個朋友負責地鐵夜間維修保養工作，我叫佢同同事加倍留意XX地鐵站路軌，睇o下有冇發現。」CY：「都係一個好方法。」
當晚半夜兩點，拿拿淋收到那位朋友來電。「拿拿淋，我o地o向路軌發現有一隻斷手呀！隻手跌o左o向o的好隱蔽o既地方，唔仔細搵真係唔容易發現，我o地經已報左警喇！」
第二天早上，陳Sir再去找拿拿淋及CY。陳Sir：「真係好奇怪，自從尋晚發現o左隻斷手之後，我雙眼就再見唔到o個隻手。」拿拿淋：「但係，我覺得件事好似未完結喎。」陳CY苦笑：「冇錯，我今朝雙眼開始見到有隻腳，係隻女仔o既腳，同時見到有幾幕XX灣o既畫面。」
拿拿淋：「我開始明白呢件事係點喇！」CY：「相信背後其實係宗肢解案，有個女仔俾人殺o左肢解，身體各部分被棄置o向唔同o既地方。女死者想伸訴冤情，所以就令陳Sir你雙眼睇到o的奇怪畫面。」
陳Sir：「咁點解要搵我呀？」拿拿淋：「你係警察，女死者自然認為你會義不容辭幫佢破案啦。」
陳Sir精神一振說：「咁我明白晒喇！我相信女死者隻腳應該被棄置o係淺水灣，我而家就馬上去搜索。」
後記：陳Sir果然在淺水灣找到女死者的斷足，隨後再憑女死者靈魂向他發出的「感應」找回餘下的斷肢，成功破案。拿拿淋與CY為死者作法超渡，使靈魂得以安息。陳Sir雖然曾受困擾，但亦因破了案而立下大功。
